Umræða um almenningssamgöngur hefur staðið yfir árum saman. Oft er bent á að nýtingin sé lítil, að kerfið henti barnafjölskyldum illa og að reksturinn sé kostnaðarsamur. Þetta eru allt gild sjónarmið, en spurningin er hvort hægt sé að gera betur.
Markmið okkar í Miðflokknum á Seltjarnarnesi er einfalt: Að skapa almenningssamgöngur sem nýtast raunverulega íbúum Seltjarnarness.
Margir íbúar hafa bent á að leiðakerfið taki illa mið af þeim ferðum sem fólk fer í raun daglega. Flest okkar sækja til dæmis matarinnkaup, veitingastaði og aðra þjónustu út á Fiskislóð. Þrátt fyrir það er engin bein tenging þangað frá Seltjarnarnesi með Strætó. Það vekur furðu að ekki sé hægt að komast með einföldum hætti að einum helsta þjónustukjarna sem bæjarbúar sækja reglulega. Sama á við um stóran hóp barna og ungmenna sem sækir æfingar hjá KR eða nemendur við Háskóla Íslands.
Hvað getum við gert?
Við höfum skoðað þann möguleika að reka eigið leiðakerfi fyrir Seltjarnarnes sem væri sérsniðið að þörfum bæjarbúa.
Hugmyndin gengur út á tvær rafknúnar smárútur sem ganga með reglulegri tíðni frá morgni til kvölds og tengja saman helstu þjónustu- og samgöngupunkta bæjarins:
- Seltjarnarnes
- Gróttu
- Fiskislóð
- Miðbæjartorgið – en þar er tenging við Strætó til austari hluta borgarinnar
- Háskóla Íslands
- KR-heimilið
Þetta væri leiðakerfi sem tekur mið af því hvert íbúar sækja raunverulega þjónustu og starfsemi.
Kostnaður og rekstur
Við höfum skoðað með hvaða hætti væri hægt að reka slíkt leiðakerfi og hvaða þjónustustig þyrfti til að það nýtist íbúum í raun. Niðurstaðan er sú að hægt væri að reka smærra og sveigjanlegra leiðakerfi með sambærilegri tíðni og núverandi Strætókerfi býður upp á.
Í dag greiðir Seltjarnarnes um 130 milljónir króna á ári vegna þátttöku í Strætó BS.
Samkvæmt okkar útreikningum myndi kostnaður við að leigja vagnana og reka þetta leiðakerfi nema um 123 milljónum króna á ári.
Þar gæti því skapast tækifæri til bæði betri þjónustu og hagkvæmari rekstrar fyrir bæjarbúa.
Hvað myndi Nesvagninn kosta íbúa Seltjarnarness?
Fyrir íbúa Seltjarnarness með Nespassa yrði þjónustan gjaldfrjáls. Aðrir farþegar myndu greiða samkvæmt gjaldskrá.
Þannig væri hægt að tryggja að þjónustan nýtist fyrst og fremst bæjarbúum, en væri samt opin öðrum sem vilja nýta sér hana.
Ef farþegar skipta yfir í vagna Strætó til áframhaldandi ferða um höfuðborgarsvæðið myndu þeir greiða samkvæmt gjaldskrá Strætó fyrir þann hluta ferðarinnar.
Meginmunurinn á þessari hugmynd og núverandi fyrirkomulagi er sá að Seltjarnarnes hefði sjálft meiri stjórn á leiðakerfinu og gæti lagað það að þörfum íbúa eftir því sem notkunin þróast.
Fleiri kostir
Ávinningurinn væri ekki aðeins fjárhagslegur.
Með minni og rafknúnum vögnum væri hægt að draga úr umhverfisáhrifum og minnka slit á götum bæjarins. Jafnframt væri hægt að reka þjónustuna með meiri sveigjanleika en í stóru og miðlægu kerfi.
Með reglulegri talningu farþega væri hægt að greina betur hvar og hvenær þörfin er mest og laga tíðni ferða að raunverulegri notkun.
Þannig gæti leiðakerfið þróast í takt við þarfir bæjarbúa í stað þess að vera fast í kerfi sem breytist lítið með tímanum.
Fyrir íbúa Seltjarnarness
Við teljum að hér séu raunveruleg tækifæri til að bæta þjónustu, nýta fjármuni betur og byggja upp almenningssamgöngur sem taka mið af daglegu lífi fólks á Seltjarnarnesi.
Almenningssamgöngur eiga að þjóna íbúunum ekki bara kerfinu sjálfu.
Markmiðið er einfalt: Að auðvelda fólki að komast í skóla, þjónustu, íþróttir, verslanir og vinnu með leiðakerfi sem er sniðið að raunverulegum ferðum bæjarbúa.
Við teljum að hægt sé að gera betur fyrir Seltirninga, með lægri kostnaði og með þjónustu sem fólk nýtir í raun.
Ef þú vilt breytingar er tækifærið núna. XM
Hákon R. Jónsson er 6. maður á lista Miðflokksins